Yaam Kws Ua Tau Hab Yaam Ua Tsi Tau
|
Kuv yog tug kws pib hab chiv tegnum "Hmoob Koomteg Rua Kev Ncaajnceeg (Hmong United for Justice)" Kuv xaav kuas mej paub meej txug yaam kuv ua hab yaam kws kuv tsi ua, tsi has tegnum kuv ua, cov ntawv kuv sau hab cov lug kuv has; tshwjxeeb cov videos kuv tso rua huv Youtube. Kuv thov mej ua zoo mloog Kuv cov Lug hab totaub qhov kuv has.
Kuv lub zeemmuag tsi tau has losis haub kuas Moob kwv rag kwv phom ntxeev num ntxeev tswv, losis has kuas Moob ua teb chaws hab tsi yog kuv has thuam ib hom kev ntseeg twg losis ib leeg twg txuj kev ntseeg. Yam kuv has yog has txug tej kev tsi ncaajnceeg, kev tsimtxom cov ntseeg. Yog kuv has kuam tej numtswv koomsam vietnam hlub tej pejxeem hab qha kuas tej pejxeem los txawj hlub lub teb lub chaws xwb. Kuv yeej tsi muaj lub sab kws yuav lug rhuav hab thuam numtswv Vietnam, vim kuv luj hlub hab nyob huv lub tebchaws Vietnam dlhau lug lawm. Tabsis vim yog txuj kev tsi ncaajnceeg txhaj ua rua kuv nyob tsi tau, hab tawm huv lub tebchaws Vietnam tuaj rua tebchaws Mekas lawm. Kuv tog saib tej numtswv puab hloov hab tso lub sab phem tseg, tabsis kuv tog ntev npaum le caag los tej numtswv lub sab yeej tsi hloov. Puab tsi tsi coj raws le txuj kevcai lijchoj (Constitution of the Socialist Republic of Vietnam) kws sau lug tuav lub tebchaws. Txuj kevcai lijchoj has ib yaam tabsis puab ua dlua ib yaam hab puab tsi ua raws le txuj kevcai ncaajnceeg kws nplajteb tau teev tseg. Yog le nuav kuv txha ua ib sab muab tej kev tsi ncaajnceeg nuav has tawm rua nplajteb nrug paub kuas tej numtswv yuav tsum tau yoog txuj kevcai hab ua le txuj kevcai has. Tsi yog muab qhov zoo ntawm txuj kevcai lug siv rua haiv tuabneeg Vietnamese xwb kuas ho tsi siv rua haivneeg tsawg, tabsis yuav tsum siv rua txhua paab txhua pawg haivneeg tsawg kws nyob huv lub tebchaws Vietnam ib yaam nkaus. Vim puab puavleej yog pejxeem Vietnam hab puab los yeej tau paab tej numtswv rua lub caij muaj tsuvrog ua ntu zug lawm. Txuj kevcai lijchoj yog tsim lug tiv thaiv lajmej pejxeem tsi yog tsim lug quabyuam caij tsuj losis muab siv lug muag noj muag haus kuas tej laj mej pejxeem txomnyem quaj nruag, ua tsi tau laagluam hab tsi muaj laj muaj teb ua. Txawm yog tej lajmej pejxeem los ib yaam, tshwjxeeb yog kuv has rua cov Moob, vim kuv yog ib tug Moob ib yaam. Peb nyob lub tebchaws twg lub tebchaws ntawd yog peb lub, tug numtswv ntawd yog peb tug. Peb yuav yuav tau koomteg nrug tsim khu mej lub tebchaws hab fwm cov numtswv kws saib peb. Yog thaum twg tsi muaj teebmeem los ua tuab zoo nrug tej num tswv has hab khu txhua yaam moog rua qhov zoo. Vim suavdlawg puavleej muaj vaaj fuam sib luag raws le txuj kevcai lijchoj kws tsawv lug tuav lub teb lub chaw. Tabsis tug kws raug tej numtswv tsimtxom nyob tsi tau zoo le ib txha kws tau tawm moog nrhav kev cawmsav rua lub tebchaws ywjpheej lawm. Nwg yog numtswv nplajteb tegnum lawm. Qhov puab yuav tau moog txawv tebchaws hab tsi tau ntawd yog nyob ntawm koomhum nplajteb losis United Nations High Commissioner for Refugees (UNHCR) saib puab txav txim sab le caag. Nwg tsi yog peb lub luag num kws peb yuav txhawj txug. Tej yaam kws peb ua tau tes yog has kuas puab paub qhov tseeb txug cov teebmeem kws raug rua suavdlawg es txhaj ua rua puab nyob tsi tau xwb. Has txug tegnum kws kuv ua tsi yog leejtwg them nyaj rua kuv es kuv txha ua. Vim yog kuv txuj kev hlub suavdlawg, kuv tshu ntawm kuv dlag tug kws kuv khwv tau lug ua paab suavdlawg xwb. Kuv yeej tsi tau ib thooj los ib pob ntawm leejtwg lug. Kuv tsi ua los tsi muaj leejtwg ua, hab yog kuv tsi ua los Vaajtswv Yawmsaub ua rua kuv lub sab kub quas lug nyob tsi tau pw tsi tsaug zug txha le yuav tsum tau ua. Yog le hov kuv yuav ua le qhov Tswv Ntuj pub lub peevxwm rua kuv. Yog mej leejwg xaav sau ntawv rua kuv losis nrug kuv thaam, sau koj tug email hab sau ntawv rua ntawm saab xis ntawm nuav losis xaav hu xuvtooj nrug kuv thaam los hu tau rua kuv. |
Part 1
Part 2
Xuvtooj: 001-651-269-6986
Losis |